Ճիշտ ընտրված լուսավորությունը ոչ միայն ընդգծում է տան ոճն ու գեղեցկությունը, այլև ստեղծում է այն հարմարավետ ու ջերմ մթնոլորտը, որտեղ հաճելի է ապրել։ Շատերը, սակայն, լուսավորությունը թողնում են «վերջին փուլին»՝ չմտածելով, որ լույսը նույնքան կարևոր է, որքան կահույքը կամ գույների համադրությունը։ 

1․ Ընդհանուր լուսավորություն

Տան յուրաքանչյուր սենյակ պետք է ունենա հիմնական՝ ընդհանուր լուսավորում։ Դրա համար հարմար են ջահերը, պանելային կամ ներկառուցված կետային լուսատուները։ Կարևոր է, որ լույսը հավասարաչափ տարածվի և չստեղծի «ծանր» մթնոլորտ։ Ընտրեք լամպեր, որոնք տալիս են փափուկ, բայց բավարար լուսավորություն՝ առանց աչքերը հոգնեցնելու։ 

2․ Ավելացրե'ք ֆունկցիոնալ լուսավորություն 

Բացի հիմնական լույսից, անհրաժեշտ է նաև ֆունկցիոնալ լուսավորություն՝ այն տարածքներում, որտեղ կատարում եք կոնկրետ գործողություններ։ Օրինակ՝ խոհանոցի կահույքի տակ տեղադրված LED ժապավենները կամ աշխատասենյակի սեղանի լամպերը ապահովում են ուղղված լույս՝ առանց ավելորդ փայլի։ Դա օգնում է կենտրոնանալ և պահպանում է տեսողության հարմարավետությունը։ 

3․ Մի՛ մոռացեք դեկորատիվ լույսերի մասին 

Լույսը կարող է դառնալ նաև ձեր ինտերիերի դիզայներական շեշտը։ Դեկորատիվ լուսատուները՝ լապտերները, լուսային ժապավենները կամ անգամ փոքրիկ գունավոր լույսերը, ստեղծում են յուրահատուկ տրամադրություն և ընդգծում տան բնավորությունը։ 

4․ Ընտրե՛ք գունային ջերմաստիճանը ըստ սենյակի 

Տաք սպիտակ լույսը (2700–3000K) հարմար է ննջասենյակների և հյուրասենյակների համար․ այն հանգստացնում է և ստեղծում ջերմ մթնոլորտ։ Սառը լույսը (4000–6000K) առավել նպատակահարմար է աշխատասենյակների և խոհանոցների համար, որտեղ անհրաժեշտ է կենտրոնացում և հստակություն։